قصص كلها خير

نائلة اشقر - الطيبة

احنا من الطيبة، وطبعا مثل ما الكل بعرف  برمضان اطفال بيوقفوا على مدخل البلد وبيطلبوا نقود.
احنا فكرنا انه بدنا نساعدهم، بس شيء لذاتهم ، مش "للمشغلين" الي بشغلوهم، فكل يوم بطبخ، بكبر الكمية وبجهّز علب بلاستيك, كل يوم بنوخذ 5 وجبات متكاملة، شو بنطبخ للدار بنوخذ، قبل الفطور، مش انه لا سمح الله اللي بيظل ورانا، بنوخذ 5  وجبات مما نأكل مع الشوربة والفلافل ويفطروا هالاطفال المساكين  بالصحة والهناء.

دعاء أبو خليل - زيمر

انا طالبه جامعيه عمري 21 سنة..
بس مثل كل الطلاب بالبلاد بشتغل نص وظيفه لحتى اقدر اصرف عحالي،
وقبل يومين خطيت خطوه كثير الها معنى بحياتي وكثير حابه اعملها من زمان..
قمت بكفاله بنت صغيره، اخترتها تكون صغيره لحتى تكبر معي وبالمستقبل ان شاء الله اقدر اعلمها وأمنلها مستقبل منيح...
شهر رمضان هو شهر الخير والعطاء بس منقدر نعمل خير كل السنه

ريان شامية – جت

هاي السنة قررت انا وعيلتي كل شهر نتبرع بمبلغ معين، لهيك دورنا على طريقة الي رح نضمن انو مصرياتي وصلت للناس المحتاجينهن فكرنا مليح وتوصلنا لاحسن حل الي يوصلنا للناس المحتاجين، رحنا وين العمال بتجمعوا قلنا للكل بدنا عمال لليوميه 20 شيقل.. كلهم صاروا يضحكوا ويقولوا اقل اشي 250 ما عدا 5 الي كان من اشكالهم مبين قديش محتاجين وكلهم كبار بالعمر وقالولنا منقدر نبلش من بكرا، قلنالهم بكرا الساعة 7 الصبح بنيجي نوخذكم. انبسطوا وكيفوا كثير، ثاني يوم لقيناهم من الساعة 6 بستنونا، حملناهم بالسيارة ووديناهم عداري اعطينا لكل واحد 1500 شيقل وشرحتين رز وزيت وكوكا-كولا ...
بعدين بعد ساعة بدنا نرجعهم عدورهم بدناش اياهم يرجعوا لحالهم، لما وصلناهم لقينا انه عنجد وضعهم المادي سيء جدا فتوجهنا لجمعية من بلدنا الي قلنالها عن المحل والوضع وهم من يوم ما قلنالهم ومش مقصرين معهم.

الاء صرصور – كفر قاسم

انا بشتغل في مستشفى للطفل. مرّه ام كانت بدها تروح معهاش مصاري مشان تشتري الدواء مشان تروّح وبدون دواء بتقدرش تروّح انا روحت شريت دواء بدون ما تعرف انو مني قولتلها هذا الدواء تبرع من المستشفى كتير انبسطت وصارت تعيط من الفرح انو بتقدر تروّح وكان الاشي قبل العيد وانها بدها تروّح عند ولادها مشان تعيد معهم وكان جوزها متوفي... اول ما شفت فرحتها وبسمتها لانها بتقدر تروّح ومعها دواء وتعيّد مع اولادها كانت هاي فرحتي بالعيد اني قدرت اساعد حدا بدون ما تعرف مين ساعدها وطلبت منها تصورلي اولادها بالعيد وهي معهم وبالعيد بعتتلي صورتهم كانت فرحتي كبيره بالصوره

صفاء اغبارية – ام الفحم

في كل فترة وفترة وخاصة في شهرنا الفضيل اعرف اشخاصا لا يملكون المال لشراء ملابس العيد لتدخل الفرحة والبهجة والسرور على أولادهم. فقررت في كل مناسبه وفي كل عيد ان اقوم بكساء عائلة وادخال الحب والدفئ عليهم لاكسوهم بملابس ومأكل ومشرب.وقبل فترة وجيزه قمت بمساهمة لعائلة فقيره واعطاءهم طرد غذائي ليقيهم من جوع الايام واغطية تقيهم من برد الطقس الذي لا يفرق بين صغير وكبير.ومن فترة لفترة اقوم بمساعدة طالب علم يحتاج المال لاكمال مسيرته التعليميه وانا على يقين ودراية تامه انه سياتي اليوم الذي سيقدم به يد الخير والمساعده لغيره . اما بشهرنا الفضيل والذي ينبع بالعطاء والخير فقد بدات انا واطفالي بتدخير المال للايتام والمساكين لنكسوهم حلل بيضاء لتكون لهم الامل والبسمة التي لن ينسوها بيوم من الايام فهذا جزء صغير من مشاريعي الصغيره واتمنى ان اهب حياتي ومالي صدقة للمحتاجين.

ريما محاميد – ام الفحم

عمري 26 سنه ، طبيبه ، قبل ان احصل على الشهادة اشتغلت في سوق خضار وفواكه في بلدتي من خلال عملي بهذه النصف سنه حدث معي موقف مؤثر كان شهر رمضان الفضيل مثل هذه الايام ، كانت امرأة تأتي كل يوم تشتري خضار قديمه غير صالحه للاكل حتى ولكن من قلة الحيله والفقر ، دخل الي يوما زبون ، ناولني مبلغ معين من المال وقال لي انت تعرفين الزبائن اكثر مني ، اعطي هاذ المبلغ لشخص محتاج ولا يهمني ان كنت انت حتى.
بدات لاختار احسن الخضار والفواكه التمر والمشروبات ووضعتهن بسله كبيره حتى انتظرت هذه المرأه التي تاتي كل يوم لتشتري اشياء خفيفه وبسيطه وعلامات الفقر والذل على ملامحها ، فقلت لها هذه العربة لك وكل هذه لك حتى ذرفت دمعتها التي لم افهمها حتى الان ..هل كانت دمعة حزن ام دمعة الم على فقرها وموقفها . ولكن يكفي انني سددت حاجتها كان ذلك امر جداً مرضي للنفس . والحمدلله رب العالمين على فعل الخير اسال الله ان يزيدنا بذلك وان ييّسر امر كل محتاج يا رب العالمين . يعطيكوا الف عافيه ، ورمضان كريم❤️

نيفين جابر – الطيبة

أجرت على حسابي لمدة سنه بيت لشب مطرود من بيته على وجه رمضان ، وساعدته بمبلغ مالي ليمشّي حالته.

اسيل أبو مخ – باقة الغربية

في الطائرة العائدة من تركيا، جلست بجانب الشباك وبجانبي الاخر امرأة مسنة، في ذلك الاثناء قامت المضيفات بالطيارة بتوزيع الحلوى على ركاب الطائرة وقطعة الحلوى هذه لونها ابيض، فظنتها المسنة قطعة من الجبن فقامت باخراج قطعة خبز من حقيبتها ووضعت فيها قطعة الحلوى التي تظنها قطعة جبن، فان قامت بالقضمة الاولى حتى عرفت انها حلوى فطئطئت رأسها واحرجت من فعلتها بعد ان قام بعض الركاب بالضحك عليها، فقمت باخراج قطعة خبز على الحال وقمت بنفس الفعل، فقضمت قضمة صغيرة وقلت عن معرفة: "اووو هذه قطعة حلوى ظننتها قطعة جبنة" فقالت المسنة بجانبي وانا ايضا ظننت كذلك فبدانا بالضحك سويا.
نعم انا اعرف بانها ليست قطعة جبن ولكن جبر الخاطر هو افضل خير ❤️

علي حيادري – سخنين

انا معلم من الشمال اعلم في الجنوب في بئر السبع، بعد شرائي ملابس في فصل الشتاء لاحظت شاباً مشرّدا جالساً بدون ملابس دافئه ويحتمي من المطر. أنّبني ضميري لذلك الشاب وتبرعت له بملابسي التي اشتريتها من دكان قريب و وعرضت عليه ان اشتري له وجبه ساخنه لكي يشعر بالدفىء.
اتمنى من ربنا ان يمدني بالقوة لاساعد هؤلاء الناس.

ميادة أبو عمر– القدس

وقع خلاف كبير بيني وبين اهل زوجي تم على اثره حرماننا من بيتنا الذي كان سكن لنا لسنوات طويلة ..مرت سنوات صعبة ببيوت الاجار وشاء الله ان يراجعوا انفسهم بعد سنوات ويعرضوا علينا العودة لبيتنا والصلح معهم ..وانا والحمدلله ومع ان الموضوع كان مسبب لي الكثير من الحزن ..فكرت وقررت ان الصلح خير وعفا الله عما سلف وعدنا الى بيتنا أجمل واهدى بيت والحمدلله دائما وابدا

رنين سمير عباس – نحف

انا طالبة تمريض
كل امتحان بعمله بقول لربي اذا نجحت رح اتبرع بمبلغ معين لناس محتاجة
او اتبرع لجامع او اتبرع لجمعيه وهيك كل امتحان ربنا بنجحني وبكسب حسنات والحمدلله مكمله على الاشي الي بقدر عليه

وعد عامر – كفر قاسم

فترة الكورونا كثير اثرت عالمستوى التعليمي لطلاب المدارس خاصة الجيل الصغير الي بعده مش واعي لواجبات ومسؤوليات. في كثير حالات اللي الاهل اضطروا يشتغلوا بعيد عن متابعة أولادهم وتعليمهن عن بعد ، وهسا بعد ما رجعوا الطلاب للمدارس حبيت اتطوع واساعدهن تيوصلوا للمستوى المطلوب منهن بهاي المرحله ، كل معلومه بفيد الطالب فيها كل نجاح لاله بحل سؤال معيين، دعمي وتشجيعي الهن كان فخر كبير كثير الي وشعور كثير حلو تقدم لمجتمعك عشان تنقذه من فجوه تكونت بسبب الكورونا ، مع بعض منقدر عكل اشي ♡

لطيفة زعرورة – حيفا

كان عندي جاره ارمله ومعها أربع أولاد صغار وانا اعرف كيف تعيش ولا يوجد لديها احد يسندها كنت أريد أن اعطيها نقود لكن لا اريد ان احرجها كنت دائما أضع النقود في ظرف واضعها في البريد وكانت دائما تسالني هل رايت احد غريب بجانب بيتها وأنا أقول لا وهي كانت تشعر بسعاده كل ما تجد الظرف اتمنى كل إنسان يقدر أن يساعد انسان محتاج لو بشيء بسيط

دعاء جرادات – الناصرة

كنت مدعوةً للغداء ذلك اليوم انا واطفالي وكان علي ان اسرع الى المدرسة لأصطحبهم الى بيت جدتهم ونهنأ بغداء لذيذ بعد يومٍ شاقٍ.
قاربت على الوصول الى بيت أهلي لأعطي امي بعض الاغراض التي وكلتني اياها من اجل الغداء قبل ذهابي الى المدرسة لكن رأيت جارنا المُسن يقف على عكازته في الشارع محاولًا ايقاف سيارة تأخذه معها الى العيادة لتعب كبير أصابه... لم اكن اعرف ذلك العجوز سوى معرفة سطحية لكنه صديق للعائلة ... طبعا لم اتوانى عن فعل الخير ورغم تعبي ورغم اني كنت قبل قليل في تلك العيادة وابنائي شارفوا على انهاء دوامهم الا أنني اصطحبته و اصريت على وضعه امام باب العيادة لأن صحته باتت متعبة جدًا وقلت له ساعود لاصطحابك عندما آخذ اطفالي من المدرسة وفعلا عدت واصطحبته واشتريت له الدواء واعدته الى منزله ... وكنت سعيدة جدا وشعرت براحة نفسية رهيبة ... رأيت أن العطاء والمساعدة لمن استطاعها هي الفعل الوحيد الذي يجعل روحك تشعر بالسكينة والامتنان والرضى لانك جعلت أحدهم يبتسم ويدعو لك يوما ما من قلبه.

حنين عدوي – طرعان

طبعا شهر رمضان لازم يكون فيه الخير للغير والحب والعطاء. كان في وحده عليها مبلغ لدكانه شفتها تعيط وتقله ما معي. المبلغ فوق ال 1000 شيكل رجعت دفعتهن بدون ما تعرف مين وشفتها بعد بيومين بالدكانة تدعي وتعيط.

كمال قعدان – باقة الغربية

كنت بصف التاسع بقت بنت بصفي فقيره شوي ومكنش معهم مصاري والحمدلله عكلشي
في مره عملنا يوم رياضي وكان لازم نوصي اكل مع كل الصف وندفع حق الاكل
بنت صفي قالت انا مش جوعانه بس انا حسيت انها جوعانه..
جبت اكل الها والي وقلتلها المدرسه بتوزع عحسابها بلزمش ندفع
الفرحه الي بقت فيها بغدرش اوصفها
صح انو عمل خير صغير اما كثير أثر فيي ❤️

حنين جرادات – شفاعمرو

اذا قصّرت بمساعدة وانا عايشة الحمدلله اني عملت بطاقة للتبرع باعضائي بعد مماتي هيك بتامل اني اكون اعطيت حياة جديدة لروح جديدة بعد قدامها عمر حلو وبكون ضميري متريح بدون ما اعرف مين الاشخاص اللي رح يستفيدو وبتامل يكونو عددهن كتير

دنيا خلايلة – سخنين

احلى اشي بالعالم انك تعمل خير وتتلقى استدعاء من هالانسان
من احد الامور اللي صارت عندي عادة اني حاطة حصالة نقود بسكني الجامعي كل يوم بحط فيها قدي في نصيب بالاخر بعطيها لحد محتاج
وبرضو ما ننسى الخير مو بس بالمصاري الخير انك تساعد حدا محتاج او اي حدا بده مساعدة
في عائلات اللي هني ما بقدرو يتأقلمو مع عالم التكنولوجيا فاحنا وظيفتنا نساعدهن فعشان هيك انا بالاسبوع بساعد كثير ناس انهن يخلصو امورهن يلي على الانترنيت وافهمهن شو لازم يعملو وغيرها
بعمرو ما الخير بس كان مصاري الخير دايما لازم يكون موجود لو كان بكلمة حلوة
كلمة ممكن تنقذ حياة انسان فعشان هيك الله يزيد الخير بقلوب الناس❤❤

شريف دعنا – القدس

عشان الشهر الفضيل، وعشان الله عز جلالة يوفقني بحياتي، عفيت عن كل شخص اذاني بحياتي.

حسن ابريق – أبو سنان

قصتي بسيطة وانسانيه..في اول يوم من رمضان المبارك حضر الي مواطن حزين متعب ومعه مستندات طلب مني تعبئتها له تخص التأمين الوطني الذي اوقف التخصصات له ..ولا يستطيع العمل لظروف صحية لديه ..وفعلا قمت بالمطلوب بتعبئة التفاصيل والارسال ومساعدة عينية مني ..واليوم حضر الي مبتسما حيث اعلمني ان التامين الوطني صادق على طلبه تراجعيا وادخال مستحقاته الماليه . شكرني جدا و.فرحت معه ..

غيداء شرارة – الناصرة

في امرأه مسنه غير متزوجة
هاي المرأه عايشة ببيت وضعه مزري، المطبخ كله رطوبة لانه فش فيه شباك، جرن المجلى واقع وممسوك بخشبة.. بتسخن مي عالغاز مشان تتحمم معندهاش جهاز تسخين المي
قررت اساعد هاي المسنة وبناء عليه حكيت مع كل اولاد عمي، احنا كاحفاد نعمل مشروع مع بعض، خليت اولاد عمي الشباب يوقفوا للشغيله واحنا البنات لمينا مصاري وساعدنا بترتيب وزيحان الغراض والحمدلله غدرنا : ندهنلها المطبخ ، حطينا باب الومنيوم مع شبكة للتهوئه بدل الشباك، غيرنالها جرن المجلى، قبعنا الخزاين القديمه وشرينا خزاين جديدة والاهم حطينا جهاز تسخين مي بالحمام.
مع بعض كاحفاد عملنا اشي حلو

مي ياسين – عرابة

عملت حفله للاطفال سميتها "خلّي قلبك ملان بالخير" ❤️وشاركوا كثير اطفال من بلدي وخارج بلدي
بشارك دايماً بحملات خيريه بالبلد . زرت اقسام الاطفال بقسم السرطان مع هديه تشجيع وعملت عيد ميلادي معهن.

مريم عمّاش – كفرقرع

كان وقتها كثير حم وروحت اروح اختي من المدرسه بالسياره وانا مروحه شفت مجموعه بنات صغار كثير اصغر من اختي حتى ركبتهم معي ووصلت كل وحده لباب بيتها

نور عيسى – كفر قاسم

اضع مبلغ من المال في سوبرماركت. وكل عائلة محتاجه تاخذ اغراض لرمضان بمبلغ 200 شيقل
دون ان يعرفو من أنا

قدر عبد القادر – الطيبة

تبرعت لاطفال مرضى السرطان بشعري
وتبرعت بالدم للمستشفيات
وجمعت بعض المصاري من الناس لاشتري كرسي متحرك لست عجوز
سامحت ناس كثيره غلطو فحقي
صالحت ناس مع بعض ورجعت متجوزين كانو على خط الطلاق
اتبرعت لناس محتاجه بمبلغ قليل الي بقدر عليه

درّست بنات صف 12 ما معهم يروحو دورات بل مجان

مهران محاميد – ام الفحم

كانت إحدى النساء تصلّح سيارتها عندي كباقي الزبائن لكن يوم من الايام كانت السيارة معطله جنب بيتهم وهي سيارة تحتسب قديمة فرأيت انها تعيش ببيت صغير بسيط تتدفق اليه المياه بالداخل فعند تصليحي لسيارتها سامحتها بالمال بطريقة ممتازه كي لا تحس وبعد ذلك استفسرت على المرأة ومن ما قالولي انها أرملة ام ل 4 بنات اكبرهن بنت لم تتجاوز ال 13 سنة
فمن ذلك اليوم الى الان أصلح سيارتها بالمجان واقول لها ان هناك من يدفع لي ثمن التصليح . لكن بالخلاصة هو على حسابي الشخصي

جميلة سليمان – البعنة

انا امرأة في منتصف الخمسينات من عمري والحمدلله الله مقدرني ان اكون بارة باهلي حتى بعد وفاتهم بسنين عدة، فقبل بضعة شهور حلمت بوالدتي واحسست ان هذه اشارة بان اتذكرها وان اقوم بشيء لها فكلمت ابني الوحيد، وفورا قال لي نعم يا امي صلة الرحم يجب ان تستمر حتى مع من توفي ودعيني نعمل خير ونتصدق عن جدتي وجدي ايضا رحمهما الله وانا مستعد لكل ما تقترحيه، رغم ان دخله بسيط، واتفقنا ان نقوم بالتبرع بافطار جماعي لمدرسة في قريتنا للتعليم الخاص للاطفال اللذين يعانون من اعاقات، وتشاركت انا وابني واتفقنا مع المدرسة واحضرنا لكل الاطفال ولطاقم المدرسة ايضا افطارا شاملا من طعام وشراب عن روح ابي وامي رحمهما الله، ورؤية الفرحة والسعادة في عيون أولئك الأطفال جعلتني اشعر بان امي وابي ينظرون الي بسعادة ❤️